Cash aid sa senior citizens ipanghatag na

CEBU, Philippines — Magsugod na karong adlawa ang pagpanghatag sa financial assistance sa mga senior citizens sa Dakbayan sa Sugbo.

Matud ni Atty. Rey Gealon, tigpamaba sa kagamhanan sa siyudad, nga duna sila’y lagda nga gipagawas kalabot niini ug ilang gipahibawo ang angay andamon sa mga senior citizens tungod kay no contact ang distribution.

Ang pagpangapod-apd mahitabo gikan sa Mayo 16 hangtud sa petsa 25 diin ang mga andamon sa mga senior citizens mao ang face mask, hand gloves, alcohol, senior citizen ID, ballpen ug magpapilit og bond paper sa gawas sa pultahan suwatan og ngalan, senior citizen ID no. ug ipatuman gyud ang social distancing.

Ibutang sa envelope ang P3,000 nga financial assistance alang sa buwan sa Marso, Abril ug Mayo ug itunol sa senior citizen ug kuhaan og hulagway alang sa documentation.

Sa mga senior citizens nga wala kabalik sa Siyudad sa Sugbo tungod kay naabtan sa implementasyon sa Enhanced Community Quarantine, si Gealon niingon nga makuha gihapon nila ang ayuda kun makabalik na sila sa siyudad.

“Hinaut makabalik sila dinhi nga mokuha nianang ilang assistance kay mao ra man gihapon atong lista hatagan man sila tanan base sa karaan pa nga lista kay posible man gud nangadto sila sa lain-laing nga dapit nga gipaubos sab sa community quarantine apan niadto sila kay kuyog sila tagsa-tagsa nila ka pamilya, sa ilang anak ba kaha o sa ilang mga igsuon kay mingaw lang kay diri ato man nang masabot kay mao sad nay gusto ipaabot sa Mayor wala tay discrimination labot niana nga kung dili ka maatlan sa inyong balay nga wala ka paso kana ang gusto sa Mayor mahatag ang senior citizen assistance sa kadaghanan,” matud ni Gealon.

Adto kini mahimong makuha sa City Treasurer’s Office pinaagi sa pagpakig-alayon sa Office of the Senior Citizens Affairs (OSCA).

Nasayran sa dili pa manghatag sa hinabang pinansiyal ang mga disbursing officer gipaubos gyud sa mass testing aron maseguro nga sila wala’y gihambin nga sakit aron dili sab matakdan ang mga senior citizens nga maoy risgo sa virus.

Gawas niini aron sab ang mga disbursing officer luwas sab ug gani dunay uban magsul-ob og Personal Protective Equipment (PPE) isip proteksiyon. /GMR (BANATNEWS)