Kapitolyo adunay P344 milyon nga nahibiling pundo

CEBU, Philippines — Nikabat ngadto sa kapin sa P344 milyones ang nahabilin nga pundo gikan sa general fund sa Probinsiya sa Sugbo sa unang quarter sa tuig 2019.

Base sa financial statement nga giluwat sa Provincial Accounting Office nikabat ngadto sa P861milyones ang actual expenditures sa Kapitolyo gikan sa bulan sa Enero hangtud sa Marso 31 karong tuiga. Matud ni Marieto Ipil, provincial accountant nga ang financial statement maoy usa sa dokumento nga i-turnover ngadto sa sunod nga administrasyon ug gihikay kini karon sa iyang buhatan.

Matud usab ni Ipil nga mokabat ngadto sa P1.2 bilyones ang nisulod nga pundo sa general fund samtang P53.6 milyones sa special education fund.

Samtang sa properties nga gipanag-iya sa Kapitolyo nikabat ngadto sa P21.6 bilyones ang kantidad sa real properties sa Probinsiya sa Sugbo base sa record sa Provincial General Services Office (PGSO).

Matud ni Jone Siegfred Sepe, hepe sa PGSO nga sa tanang properties sa probinsiya ang mga luna maoy nakatampo og dako nga kantidad. Sa record sa PGSO kasagarang luna nga gipanag-iya sa Kapitolyo nahimutang diha sa Barangay Mabolo, Dakbayan sa Sugbo; Dakbayan sa Naga; 93-1 lots, Lahug; luna sa Central Command (CentCom) ug airstrip sa Bantayan.

Dugang ni Sepe nahuman na sila sa pag-inventory sa properties sa probinsiya subay sa gikatakdang turnover sa administrasyon sa Kapitolyo. (/BDB)(BANATNEWS)