Subay sa sweldohan sa holiday kagahapon

CEBU, Philippines – Gideklarar nga kagahapon, Mayo 13, adlaw sa piniliay, usa ka special non-working holiday.

Subay niini, si Slome Siaton, ang regional director sa Department of Labor and Employment-7 miingon nga ang mga empleyado nga adunay trabaho kagahapon, angay nga makadawat og insaktong sweldohan.

Nakalatid kini sa Labor Advisory No. 07, Series of 2019 alang sa Mayo 13 nga kon ang empleyado wala motrabaho, nagpasabot kini nga wala usab siya’y sweldo apan magdepende gihapon kini sa naandang palisiya sa usa ka kompaniya o sa ilang collective bargaining agreement sa pagbayad gihapon bisan og holiday.

Kon ang usa ka empleyado mitrabaho, aduna siya’y dugang bayad nga 30 porsiyento sa iyang sweldohan bugti sa walo ka oras nga pagtrabaho.

Kon mitrabaho og sobra sa walo ka oras o nag-overtime, ang trabahante adunay dugang 30% sa iyang sweldo sa matag         oras nga iyang gitrabahuan.

Ang mitrabaho og special day nga atol usab sa iyang day-off, makadawat og dugang 50% sa iyang basic wage sa unang walo ka oras ang usa ka trabahante.

Ug sa trabaho nga misobra og walo ka oras o overtime panahon sa special day ug atol usab nga day-off sa trabahante, siya adunay dugang 30% sa iyang matag oras nga sweldohan sa maong adlaw.

Ang DOLE nagpasidaan usab ngadto sa mga nangimpleyo nga timan-an ang computation sa maong pagsweldo sa ilang mga trabahante.

Ang pagpagawas sa naasoy nag Labor Advisory pinasubay sa Proclamation No. 719 nga gipagawas ug gipirmahan sa president niadtong Mayo 9. (/DILT)(BANAT NEWS)