Asawa ug kabit nasakpan sa bana

CEBU, Philippines – Asawa ug kabit nasakpan sa banang Overseas Filipino Worker nga giingong nagpinarayganay diha mismo sa ilang balay sa Barangay Tayud, Lungsod sa Liloan.

Ang maong insidente nahitabo niadtong Lunes sa gabii diin ang maong adlaw birthday sa maong asawa.

Ang 39-anyos nga bana OFW sa United Arab Emirates.

Gipugngan sa Banat News ang mga pangalan sa nalambigit aron sa pagprotekta sa ilang tagsa-tagsa ka pamilya.

Matud ni Police Master Sergeant Jonas Catubig sa Liloan Police Station nga niadtong Mayo 1 nagpakaaron ingnong mobalik na sa UAE ang bana. Kini human nakadungog ang bana og mga estorya kalabot sa giingong pagpangabit sa iyang 38-anyos nga asawa sa 34-anyos nga lalaki nga taga Barangay Talamban, Dakbayan sa Sugbo.

Giingong samtang nagtago ang bana sa panimalay sa iyang igsuon nanugo kini og tawo nga maoy magsunodsunod ug maniid sa iyang asawa.

Human sa lima ka adlaw, Mayo 6, giingong adunay usa ka lalaki nga naabot sa ilang balay.

Nanawag og mga polis ang bana ug didto naabtan nila nga nagpinarayganay ang duha.

Natanggong karon sa custodial facility sa Liloan Police Station ang duha ka mga dinakpan ug giingong desididong mopasaka og kaso ang bana batok sa iyang asawa ug kabit niini. (/BDB)(BANAT NEWS)