Babaye gipusil patay sa lalaking nanoktok
CEBU, Philippines — Patay ang usa ka babaye human kini pusila sa wala mailhing kriminal kinsa nanoktok sa pultahan sa balay sa biktima niadtong Martes sa kadlawon diha sa Purok Bantigue, Barangay Luyang, Lungsod sa Carmen. Si Police Master Sergeant Roy Cabahug sa Carmen Police Station niila sa biktima nga mao si Marilyn Abraham, 44-an yos, minyo, nagpuyo sa maong dapit.
Matud ni Cabahug nga nag-inusara nga natulog sa ilang panimalay ang biktima ug nadunggan sa mga silingan nga adunay nanuktok sa pultahan sa balay niini.
Niadtong higayona ang biktima giingong nakatulog na kini apan nahigmata tungod sa toktok sa pultahan.
Si Cabahug nagkanayon nga dihang giablihan sa biktima ang pultahan nisugat sa panan-aw niini ang sumbohan sa armas sa wala mailhing lalaki dayon pusil ngadto kang Abraham.
Human sa pagpamusil ang maong lalaki nagdali usab sa pagsibat pahilayo sa maong dapit.
Ang biktima dali nga gidala diha sa Danao Provincial Hospital sa Dakbayan sa Danao apan gideklarar kini sa mga doktor nga patay na nga naabot sa tambalanan.
Dugang ni Cabahug nga lakip karon sa ilang imbestigasyon mao ang pagkalambigit sa bana sa biktima sa pagpangulata hinungdan nga natingkagol kini karon sa detention cell sa Carmen Police Station. BDB (BANAT NEWS)
- Latest