Ferry boat nga manukad sa Liloan, gitinguha

CEBU, Philippines — Gihangop  sa mga  mulopyo  sa  amihanang  bahin   sa   Lalawigan  sa Sugbo  ang gitinguha  karon nga pagbukas sa usa ka pantalan alang  sa pagbiyahe og  ferry  boat gikan sa Lungsod sa Liloan paingon sa Dakbayan  sa Lapu-Lapu.

Si Lilibeth Jordan, 27- anyos  nga taga  Brgy. San Vicente sa Lungsod sa Liloan kinsa nagtrabaho  sa Timex  Philippines  sa  Mactan Export Processing Zone 1 (MEPZ  1) miingon nga hapit  duha  ka oras   ang iyang biyahe  matag tambong  niya sa iyang  trabaho.

Kon mahuman na ang pagaugmaron nga pantalan  sa  Brgy. Polacion sa  maong lungsod, aduna na unyay ferry  boat nga  ilang kasakyan paingon sa ilang trabahuan diin sulod lang sa 35 minutos ang biyahe.

Si  Eugene Erik Lim, ang president ug chief executive officer  sa  TopLine Group of Companies  miingon   nga  ang  giugmad nga pantalan maoy  maghatag  og kasayon sa  pagbiyahe  sa  mga  lumolopyo  sa amihanang Sugbo nga mao  usab  ang pinuy-anan sa kapin  15 mil ka mga trabahante sa MEPZ 1.

“For this port development, it’s more of easing traffic congestion in Metro Cebu and to connect other ports to this port. We’re also catering to ferries for passengers as well as cargoes and RoRos,” matud pa ni Lim. Gitataw  usab  niya nga ang aspeto sa turismo maoy ilang gitinguha nga mapalapdan pa ang  serbisyo  sa  TopLine  Express  nga nagbasi  sa Lapu-Lapu aron makabig  ang mga lokal  ug langyaw  nga mga turista.

Nasayran nga kasamtangang gihimo karon ang pantalan nga nahimutang sa  luyo nga bahin sa La Consolacion College, tapad sa San Fernando Rey Parish sa  Liloan.

Gitakda  kini nga mahuman  sulod  sa  unom  ngadto sa  siyam  ka bulan ug posibleng magamit na sayo sunod tuig.

Dugang ni  Lim  nga aduna unyay tulo ka ferry boat nga mokarga og  300 ka mga  pasahero gikan sa Liloan paingon sa Mactan ug Liloan paingon Cebu nga mobiyahe og ka napulo matag adlaw.

“It will cut the travel time from Liloan to Mactan within 30 minutes, while Liloan to Cebu will just be reached within 45 minutes,” dugang pa ni  Lim kinsa midugang nga kapin  sa  P1 bilyon ang ilang gibubo nga puhonan alang sa tulo ka hugna  nga kaugmaran sa maong kalambuan. (/DILT)(BANATNEWS)