Magpale-Davide tandem?

CEBU, Philippines — Hayan magbaylo og posisyon nga daganan sila si Gobernador Hilario Davide III ug Bise Gobernador Agnes Magpale sa eleksiyon sunod tuig.

Gitug-an sa Banat News sa kasaligang tinubdan nga duol sa parehong kampo nga magbaylo silang Davide ug Magpale.

Si Magpale na ang modagan sa pagka-gobernador ug si Davide ang bise-gobernador.

Si Davide nihimakak sa maong taho ug nipakita sa iyang certificate of candidacy (COC) sa mga sakop sa media atol sa press conference kagahapon diin nalatid nga pagka-gobernador ang iyang daganan. Una na sab nga gihimakak ni Magpale ang "Magpale-Davide" tandem.

Kagahapon atol sa interview sa bise gobernador wala na kini motubag sa pangutana ug nagkanayon nga atangan na lang ang ilang pagduso og COC karong adlawa diin human niini adunay press conference nga mahitabo.

Si Magpale nihimakak sab sa taho nga adunay mga tawo si Davide nga gusto niya ipatangtang ug gihimo nga kondisyon sa pagpakigpares kang Davide isip runningmate.

"There were complaints nga directed sa executive, so my reason for that, I brought that to the Governor and I said these are the complaints against your people.

I did not mention names, I just say mao ni ang mga reklamo nila, that's for you to find out," matud ni Magpale.

Samtang kalabot sa pagbalhin sa mga mayor, si Magpale wala ra nabalaka ug nagkanayon nga aduna silay bana-bana nga upat ka distrito nga mosuporta sa ilang kandidatura.

Samtang si Davide nasubo nga pipila sa iyang mga kauban kaniadto sa Liberal Party ang nibali sa laing partido.

Human sa eleksiyon sa 2016, mayoriya sa mga mayor ubos sa LP apan niadtong Nobiyembre sa niaging tuig nitapon na sa Partido Demoktariko Pilipino-Lakas ng Bayan (PDP-Laban) nga partido ni Presidente Rodrigo Duterte ug karon kaalyado na ni Kongresista Gwendolyn Garcia sa One Cebu Party kinsa magpapili sa pagka-gobernador.

Usa sa mga mayor nga kaalyado ni Davide mao si Consolacion Mayor Teresa "Nene" Alegado kinsa matud ni Davide nipahibalo kaniya niadtong niaging semana nga mobalhin siya og partido.

"In conscience also, I won’t give up the party that nurtured me. This is the party that drafted me in 2010, 2013 and 2016," matud ni Davide.

Si Davide nagkanayon nga lig-ong kaatbang si Garcia sa umaabot nga eleksyon ilabi na nga nag-agi na kini sa pagka-gobernador kaniadto apan wala siya nahadlok niini.

"She's formidable," matud ni Davide. Si Davide ug Garcia unang nagkaatbang sa 2010 diin siya napilde. (BANAT NEWS)