50 ka polis bansayon aron mahimong imbestigador

CEBU, Philippines – Dili momenos 50 ka mga polis ang ipaubos sa 35 ka adlaw nga pagbansay sa criminal investigation course aron pagpalambo sa pagsulbad sa kapolisan nga masulbad ang mga krimen pinaagi sa maayong teknik sa imbestigasyon.

Ang bag-ong hepe sa case monitoring section sa Regional Investigation and Detective Management Branch nga si Chief Inspector Rose Santolorin nagkanayon nga nagkinahanglan sila og maayong mga imbestigador sa rehiyon.

Tungod kay nasuta nila karon nga kasagaran sa mga imbestigador sa nagkadaiyang police stations walay pormal nga background sa pag-imbestigar kay sila nakat-on pinaagi lang sa kasinatian.

 “They have the experience, some of the investigators they have experiences on investigation but they do not have any formal training on investigation so that is why they need a training, competency training on investigation for them also to become competent investigators,” si Santolorin miingon.

Dako usab kini og tabang ilabi na ngadto sa mga bag-o lang nga nahimong polis.Kasagaran sa mikuha sa maong training mga Police Officer 1 pa lang.

Dili lang sa usa ka siyudad sila nitutok apan lakip na ang tibuok ubos sa rehiyon syete. Ang bag-ong hepe sab sa Investigation and Detective Management Branch sa Cebu City Police Office nga si Supt. Leoncio Baliguat Jr. nagkanayon nga  wala usab nila gipokus sa mga imbestigador sa homicide sections sa matag police stations ang training.

Gisugdan na kagahapon ang maong pagbansay ug mahuman kini sa unang semana sa Nobiyembre.

Sa laing bahin, adunay 17 ka mga Toyota Hilux nga mga sakyanan ang moabot alang sa Police Regional Office-7 gikan sa Kampo Crame karong adlaw’ng Domingo.

Tagaan og usa ka sakyanan ang Siquijor Provincial Police Office aron ibutang sa ilang Provincial headquarters.

Ang upat niini gitagana alang sa upat ka mga lungsod sa Cebu Provincial Police Office: Sta Fe, Sogod, Dakbayan sa Toledo ug lungsod sa Tudela.

Tulo usab ang madawat sa Cebu City Police Office aron ibutang sa headquarters niini, sa Mambaling Police Station ug sa City Mobile Force Company.

Aduna say usa ka sakyanan alang sa Lapu-Lapu City Police Office ug sa CMFC niini. Samtang tulo alang sa Mandaue City Police Office.

Makadawat sab ang Negros Oriental Provincial Police Office og upat ka mga sakyanan, sa Canlaon Police Station, La Libertad Municipal Police station ug sa Sibulan MPS.  (/IBM)(BANAT NEWS)