Duterte: Presidente ray makahatag og amnestiya

CEBU, Philippines – Ang gahom paghatag og amnestiya  eksklusibo lamang nga mahatag sa presidente sa nasud ug dili ni bisan kinsa lamang subay sa Batakang Balaod sumala pa ni Pres. Rodrigo Duterte sa interbyu kaniya ni Presidential Chief Legal Counsel Salvador Panelo kagahapon pinaagi sa RTVM.

Ang pamahayag ni Duterte may kalabotan kini sa gikwestiyong pagpakawalay bili sa amnestiya ni Senador Antonio Trillanes IV sa mutiny ug rebelyon nga gihatag sa administrasyong Aquino.

Si Trillanes ang numero uno niya karong kritiko anaa karon sa kostudiya sa Senado samtang nagpaabot sa tubag sa Korte Suprema sa iyang petisyon pagkwestiyon sa legalidad sa proklamasyon ni Duterte aron siya arestuhon. Ang Korte Suprema kagahapon mibasura sa iyang petisyon tungod kay ang mga trial courts ug Court of Appeals ang angay moresolba niini.

Si Duterte sa one-on-one talk nilang Panelo miinsister nga sa iyang pagsabot ang presidente lamang sa nasud maoy makahatag og amnestiya.

 “One of the glaring mistakes of the Aquino administration was to extend an amnesty  but the procedure was totally wrong in the sense that he just issued a proclamation, no particular names, it was a matter of statement to cover the individual and any of the act of the mutineer. Ang problema niyan he designated Gazmin (kanhi Defense Secretary Voltaire Gazmin) to investigate, and there was a committee and the committee came up with a resolution to grant amnesty. On that basis, Gazmin wrote to the president that they are recommending an amnesty. Correct, walang problema yan, the problem is after recommending, at the end of narration, the narrative there, Gazmin signed the amnesty itself,” matud pa ni Duterte.

Apil sa mga eksklusibong gahom sa presidente sa nasud mao ang pagdeklarar og Martial Law ug ang pagsuspenso sa habeas corpus.

“An act of pardon or amnesty is an act of state. It cannot be delegated to anybody but to the person of the president himself. It is not a circular that is followed by secretaries or a procedure prescribed by the Office of the President,” dugang pasabot ni Duterte.

Gipasabot usab niya nga ang rebelyon o kudeta nga gibuhat sa mga mutineers kon milampos pa mahimong makapalagpot sa naglingkod nga gobiyerno. Busa bugtong ang presidente lamang maoy makapasaylo kanila.

Giklaro sa pangulo nga “constitutional mandate” ang eksklusibong gahom sa pangulo paghatag og amnestiya.

Apan andam niyang dawaton kon ang Korte Suprema mokonsiderar nga legal ang gibuhat sa nakalabay nga administrasyon.

Sa laing bahin, si Duterte mibutyag nga aduna silay kasaligang impormasyon gikan mismo sa intelligence sources sa ubang nasud nga misimpatiya sa iyang administrasyon nga nag-usa si CPP-NPA-NDF Chairman Jose Maria Sison, ang Magdalo ug mga tawong dili gusto sa iyang pamunoan.

Wala hinuon motug-an si Duterte kon unsa nga nasud,  apan bag-ohay lang miabot ang pangulo gikan sa nasud sa Israel ug Jordan. Makadaghan nang higayon nitug-an sa mga interbyu nga ganahan siyang adto lang  mamalit og intelligence gathering gadgets ang Pilipinas sa Israel.

Misaad siya nga ipublikar nila ang mga impormasyong gituohan niyang mga plano aron siya palagputon.

Gipahinumduman usab niya ang militar ug kapolisan nga dili na kinahanglan nga sila magunay-unay, sundalo batok sundalo.  Matud niya, kinahanglan lang siyang sultihan kon di na sila ganahan kaniya kay andam siyang mokanaog sa puwesto. (BANAT NEWS)