BJMP naghuwat sa imbestigasyon sa kapolisan
CEBU, Philippines – Nagpaabot ra ang Talisay City Jail sa imbestigasyon sa kapolisan labot sa tulo ka binilanggo nga gipatay niadtong Hulyo 20 samtang padulong unta sa hearing sa ilang kaso.
Si Chief Supt. Arnold Buenacosa, director sa Bureau of Jail Management and Penology 7, nagkanayon nga ang krimen nga mahitabo gawas sa prisohan ila na sa kapolisan ang imbestigasyon.
Matud ni Buenacosa nga andam sa pagkooperar sa kapolisan ang iyang mga sakop aron mahatagan og hustisya ang kamatayon sa mga binilanggo nga sila si Yayam Gaviola, Marwin Abelgas ug Jovencio Rabadon.
Ang mga napatay pulos adunay kaso sa ginadiling drugas kinsa sakay sila sa sakyanan sa BJMP nga may duha lang ka escorts.
Apan 300 metros gikan sa prisohan gibabagan sa 14 ka wala ilhing mga tawo ug gipamusil hinungdan nga nakabsan sa ilang kinabuhi ang tulo samtang ang duha ka escorts wala ra maunsa.
Asoy pa ni Buenacosa nga ilang tan-awon kun aduna ba’y nalapas ang iyang mga sakop aron mapasakaan sab sila og kasong administratiba. (/GMR)(BANAT NEWS)
- Latest
