Konsehal sa Barangay Lagtang gipatay

CEBU, Philippines – Patay diha-diha ang batan-ong konsehal sa Barangay Lagtang sa Dakbayan sa Talisay human gibanhigan sa upat ka mga lalaki nga nagsakay og duha ka motorsiklo diha sa Cebu South Coastal Road sa Barangay Cansojong, Dakbayan sa Talisay kagahapon sa buntag. Ang biktima nailhan nga si Art Stephen Bas, 23, taga Barangay Lagtang.

Si PO2 Gerard Larong kinsa nagbiyahe sa atbang nga lane sa biktima mitug-an nga nakadungog kini sa buto-buto sa armas hinungdan sa iyang paghunong ug miresponde. Apan sa iyang pag-abot nagdinaganay na ang mga tawo ug gitapok-an ang Ford Everest SUV  sa biktima.

Matud pa niya nag-aginod ang mga sakyanan niadtong tungura dihang gipaulanan og bala ang sakyanan.

Giingong ang usa sa mga mamumuno nga nag-atang nang daan sa dapit miabli sa sakyanan ug gitiwasan ang biktima ug pagkahuman miikyas palayo luwan sa motor. Ang biktima nakabsan gyud sa kinabuhi.

Nakuha sa kapolisan sa crime scene ang 14 ka basiyo ug usa ka bala sa .45.

Ang biktima usa ka graduating student sa Cebu Institute of Technology-University (CIT-U) sa kursong Mechanical Engineering ug padung na  moeskuyla anang tungora.

Ang biktima anak ni kanhi Lagtang barangay kapitan Ferdinand “Dindin” Bas nga nalakip sa gipangalanan ni Presidente Rodrigo Duterte nga narco-politicians.

Si kapitan Bas gidakop pipila ka buwan na ang nakalabay human dunay nakuhang ilegal nga armas ug granada sa ilang balay apan nakapiyansa kini.

Ang apuhan sa biktima nga kasamtangang konsehal sa Siyudad sa Talisay nga si Arturo Bas mao ang chairman sa komitiba sa kahapsay ug kalinaw.

Si SPO1 Frederick Larrobis sa Talisay City Police nagkanayon nga susihon nila ang background sa biktima ug kon may koneksyon ba kini sa background sa iyang amahan ang pagpamanhig.

Buot nilang susihon kon nasaypan ra sa mga mamumuno nga ang iyang amahan maoy nagmaneho sa sakyanan. (/IBM)(BANAT NEWS)