4-anyos nga bata napagan sa police operation

CEBU, Philippines — Usa ka 4- anyos nga bata ang napagan patay atol sa gipahigayong operasyon batok drugas sa kapolisan diha sa Sitio Bato, Barangay Ermita, Dakbayan sa Sugbo kagahapon sa hapon.

Ang hepe sa Carbon Police Station nga si Police Senior Inspector John Kareen Escober miingon nga nakadawat og reklamo ang ilang mga sakop bahin sa mga nag-repack ug nagsuyop og ilegal drugas sa usa ka payag diha sa maong lugar.

Matud niya sa pagsusi sa mga polis didto  nakompirmar ang impormasyon ug nagpaila sila nga mga polis nag-iyahay og panagan ang mga tawo.

Apan adunay tulo ka wa pa mailhing lalaki ang nanukol ug ang usa nibunot og armas maong gilayog kini sa polis apan may mibuto nga armas ug dihadiha nakaikyas ang tulo.

Sunod na lang nilang nahibaw-an nga adunay 4-anyos nga batang napusilan sa dughan nga nagpuyo sa tupad nga payag. Ang batang si Bladen Skyler Abatayo gidala sa mga polis sa tambalanan apan gideklarar kini ngadto nga patay na.

“We are confident nga dili ang atong polis ang nakapabuto ato. Kay wala may signs sad sa pusil sa atong mga polis nga sila nakapabuto ato,” si Escober miingon.

Kasamtangang giimbestigaran pa sa kapolisan ang maong panghitabo hasta na pud sa pangalan sa mga suspetsado.

Apan wala maghisgot si Escober kon ipaubos ba niini sa imbestigasyon ang mga sakop ug pagpaubos kanila sa paraffin test ug ballistics test sa ilang mga armas aron pagpamatuod nga di iyang mga sakop ang nakapatay sa maong bata.

Ang hepe sa Investigation and Detective Management Branch nga si Police Supt. Ryan Devaras miingon nga mopahigayon sila og imbestigasyon sa maong panghitabo apan wala pay desisyon kon parelibohan ang maong mga polis nga nalambigit. (IBM) (BANAT NEWS)