Idlas nga “pusher” napatay sa kapolisan

CEBU, Philippines — Patay ang giingong usa sa mga idlas nga tigpayuhot og ginadili nga drugas sa amihanang bahin sa Sugbo human giingong nakigpinusilay kini sa mga polis atol sa gipahigayon nga buy-bust operation sa Barangay Liki sa Lungsod sa Sogod niadtong Biyernes sa buntag.

Ang napatay mao si Henry Hortezano alyas ‘Ilaga’ ug nagpuyo sa nahisgutang dapit.

Si Police Senior Inspector Willam Humoc, hepe sa Sogod Police mitug-an sa Banat News nga hapit maigo ang usa sa iyang mga sakop kay kalit nga namusil ang suspetsado human niini mabantayi nga polis ang iyang kasabot.

Matud pa nga wala magtuo ang police poseur buyer nga pusil diay ang giputos sa sinina sa suspetsado nga duha ka higayon nakapabuto niini apan swerte lang nga wala gyud kini makaigo.

Ang back-up nga polis maoy daling mibawos kang Hortezano hinungdan sa pagkaigo niini sa hawak.Gidala siya sa tambalanan apan gideklarar nga dead on arrival.

Si Humoc miingon nga  idlas si  Hortezano kay di kini magdugay og puyo sa usa ka lugar.  Gidugang usab sa maong hepe nga ilado usab kini nga mangingilad ilabi na sa sugal ug kawatan ang suspetsado.

Aduna usab   report nga nadawat ang kapulisan sa Sogod nga adunay pending nga kaso sa ilegal nga drugas si Hortezano sa laing lungsod.

Nasakmit gikan sa suspetsado ang usa ka kalibre sa 38 nga adunay duha ka bala ug laing duha ka basiyo sa tambor niini.  Laing nakuha ang unom ka gagmay’ng pakete sa gituohang shabu ug usa ka medium nga pakete nga adunay sulod nga dahon sa Marijuana.

Sa laing bahin, mokabat sa P300 mil nga kantidad sa shabu ang nasakmit sa managlahing anti illegal drug operation sa kapolisan sa Dakbayan sa Lapu-Lapu, Lungsod sa Catmon  ug Lungsod sa Consolacion. Sa maong operasyon onse ka tawo usab ang nangadakpan.(Romeo Limpangog/IBM)(BANATNEWS)