Multa sa illegal fishing gipatas-an
CEBU, Philippines — Gipatas-an sa Bureau of Fisheries and Aquatic Resources (BFAR) ang multa sa bisan unsang kalapasan sa balaud sa panagat.
Matud ni Cherryle R. Gipal, fishing regulations officer sa BFAR-7, nga gipatas-an nila ang multa gikan sa P20,000 ngadto sa P500,000 depende sa kalapasan.
Sumala pa ni Gipal nga kung sa una mopili ang huwes kung prisohon ba o pamultahon ang akusado, ang bag-ong Fisheries Code nagmando sa pagpahamtang sa multa ug pagkapriso.
Ubos sa balaud, adunay administrative adjudication diin papilion ang akusado kung iagi ba ang kaso sa piskal o ipaagi og amicable settlement.
Matud ni Atty. Mary Rose Lituañas, hearing officer sa BFAR nga imbis ipaagi og adjudicial set-up ang kaso, pwedeng mopili siya nga sa papeles na lang ipaagi og adunay clarificatory conference ug mamahimong makigsabot-sabot ug imbarguhon ang ilang mga gigamit sa pagpanagat.
Dugang ni Gipal nga mosaka ang multa matag tulo ka tuig ug daghan pang klase sa silot ang ipatuman aron matagam gyud ang mga mananagat nga mohimo og ilegal. - Flaire A. Bayalas ug Jezalyn L. Capute, CNU Interns (BANAT NEWS)
- Latest