Karambola, 3 patay

CEBU, Philippines —  Upat ang patay sa nahitabong duha ka aksidente sa lungsod sa Argao diin ang usa sa hitabo nagkarambola ang tulo ka mga pribadong sakyanan ug usa ka truck diha sa Sitio Himongbongan, Barangay Taloot, Argao sa habagatang bahin sa Sugbo kagahapon sa alas 10:50 sa buntag.

Dead on the spot silang Virgilla Sillote, 61, ug ang 4- anyos nga si Vince Brylle Villaces, pulos  taga lungsod sa Minglanilla nga sakay sa usa ka Suzuki multicab van nga gimaneho sa bana ni Virgilla nga si Aquillo Sillote,62,  kinsa namatay usab sa Isidro Kintanar Memorial Hospital.

Sigun pa sa hepe sa Argao Police station nga si Chief Inspector Cesar Misola, ang maong mga nakalas tulo lang sa unom ka sakay sa maong multicab nga gikan pa og family outing didto sa Oslob paingon na unta manguli.

Matud pa ni Police Officer 1 Jayson Lobendina, nagsunod sa maong multicab van ang usa ka Toyota Wigo nga sakyanan nga may plakang A2 R484 ug gisundan sab kini sa usa ka Sports Utility Vehicle (SUV) nga Kia Sorento.

Giingong gimaneho ni Julius Ceasar Olayvar, taga Tungkil, Minglanilla ang maong Toyota Wigo samtang ang Kia nga SUV gimaneho ni Sulpicio Ubod, 67, residente sa barangay Guadalupe, Dakbayan sa Sugbo.

Samtang sa pikas lane, ilang kasugat ang Fuso Truck nga adunay plakang ABK 5832 ug nagkarga og mais gikan sa Dakbayan sa Mandaue padung sa Argao, gimaneho ni Lionel Judith, 32, taga Dakbayan sa Lapu-lapu.

Si Lobendina miingon nga si Olayvar mitug-an kanila nga milapas sa pikas nga lane ang maong Suzuki Multicab van hinungdan nga nabangga niini ang truck hinungdan nga mibuto ang ligid sa walang atubangan sa trak.

“Pagka-igo niya sa trailer, tungod sa impact kay nituyok ni ang multicab mga 180 degrees pabalik sa iyang lane ug naigo niya ang Toyota Wigo,” sigon pa ni Lobendina.

Matud pa sa maong polis nawagtangan og kontrol si Judith sa trak hinungdan nga iyang nabanggaan ang Kia SUV sa luyo sa Toyota Wigo ug nalahos kini sa railings sa daplin sa maong karsada hangtod nga naabot kini sa bakhawan ug natumba.

Lakip usab nga gidala sa maong tambalanan ang mga sakay niini nga silang Maricel Fat, 29, Kurt Lenmark Fat, 5, Reymark Sillote Villaces, 12, Ayisha Sillote, 9, kinsa padayon pang nagpaalim karon sa tambalanan.

Wala ra maunsa ang ubang mga drayber sa nalambigit nga mga sakyanan.

Sa laing aksidente, patay ang usa ka Jerry Famulagan Cariñoza, 40 anyos ug taga Sitio Payahan,  Barangay Bogo, sa mao gihapong lungsod human kini nagkabanggaanay sa pribadong sakyanan nga usa ka Toyota Wagon Innova sa national highway sa Barangay Tulic, Lungsod sa Argao niadtong Sabado sa gabii.

Dead on arrival sa Isidro Kintanar Memorial Hospital si Cariñoza human nalagpot gikan sa gimanehong motor dihang nakabangga niini ang sakyanan nga gimaneho ni Hisel Babatido Selemo, 41.

Base sa imbestigasyon si Famulagan padulong sa Barangay Poblacion, Argao samtang si Selemo padulong sa Dalaguete apan pag-abot sa kurbada giingong mi-overtake si Famulagan sa nag-una kaniyang sakyanan ug nisulod sa lane nga gisubay ni Selemo hinungdan sa panagbangga. Naangol usab sa aksidente si Selemo.

Matud pa sa pag-umangkon ni Famulagan nga si Christian Mier ngadto sa kapolisan, gikan sa buwangan ug nakainom ang biktima diha sa barangay Bogo, wala unta nila kini tugoting magmaneho kay nakainom apan miinsistir kini. Tungod sa kabalaka gisundan niini ang iyang uyoan ug siya mismo nakasaksi sa maong aksidente. - Kathleen Kaye Gonzaga,  CNU Intern (BANAT NEWS)