Osmeña: Mambaling-BMO way malisya apan sayop

CEBU, Philippines — Way nakitang malisya si Cebu City Mayor Tomas Osmeña bahin sa solicitation letter sa Mambaling-Barangay Mayor’s Office (BMO) nga gireklamo karon sa barangay kapitan diha sa iyang buhatan.

Si Mambaling Barangay Captain Wilfredo Go nagpadala og suwat kang Osmeña mahitungod sa reklamo nga iyang nadawat may labot sa giingong pag-solicit sa Mambaling-BMO.

Gipasukip sa kapitan sa iyang suwat ang solication letter nga migamit sa official seal sa barangay nga dunay petsa November 16, 2017 alang matod pa sa contingents sa Mambaling-BMO nga dunay pirma sa choreographer, Head sa BMO, BMO official/Organizer, BMO Assistant Head ingon man sa usa ka pari.

Apan si Osmeña miingon wala siya’y nakitang malisya sa suwat tungod kay gawas sa pirma sa mga BMO officials anaa usab didto ang pirma sa kura paroko nga nagpasabot ang intensiyon alang gyud sa ilang komunidad ug dili sa ilang personal benefits.

Giangkon hinuon ni Osmeña nga sayop ang gibuhat sa Mambaling-BMO apan posible usab nga wala sila masayod nga nakalapas sila sa balaod.

Matud sa mayor iyahang maymayan ang staff sa BMO ug mipasidaan sa tanan nga di gamiton ang pangalan sa barangay o kaha sa siyudad.

Si kagawad Arturo Belciña miangkon nga nakapirma sila og solicitation nga gigamitan og seal sa barangay kay incumbent man sila ni Konsehal Emier Hamis, apan sa dihang may nakasulti kanila gikan sa Barangay Affairs Office nga illegal ang ilahang gihimo, ilaha dayong gi- recall ang tanan solicitation letter, apan adunay uban wala mauli ug maoy hinungdan nga nakakuha og kopya ang dili nila kaalyado.

Dugang pa ni Belciña, sa mga solicitation letter nga ilang napagawas nga adunay selyo sa barangay nga dunay ilang pirma ilahang gibawi ug wala silay kwarta nga nadawat gikan niini. Gitug-an ni Belciña naghimo sila og laing solicitation letter nga wala na ilang pirma, apan mopagawas unya sila og kwentas klaras bahin niini.

Samtang si Narciso Gador, BMO-Officer sa Mambaling midason sa pamahayag ni Belciña.

Sa pikas bahin, si Richard dela Torre, ang choreographer sa contingent sa Mambaling-BMO nitug-an nga igo ra siya nipirma sa maong solicitation apan ang paghatag ug ang pagkuha anaa na sa mga nagdumala.

Apan bisan kon lusot ang Mambaling-BMO mahitungod sa isyu sa solicitation gusto sa mayor ipaubos sila og imbestigasyon mahitungod sa peryahan atubang sa ilang buhatan. (BANAT NEWS)