Laing kabanay ni Barok sikop

CEBU, Philippines — Nadakpan sa nagsunod-sunod nga buy-bust operation sa kapolisan ang laing kabanay sa napriso na nga druglord nga si Alvaro “Barok” Alvaro sa Cebu Provincial Detention and Rehabilitation Center.

Ang operasyon gipahigayon sa Sitio Tabok, Looc, Dakbayan sa Danao alas 12 pasado sa niaging Huwebes sa tungang gabii nga niresulta sa pagkasikop ni Christian Alvaro Sanchez, 25, nagpuyo sa maong dapit.

Dugang kauban ni Sanchez nga nadakpan mao sila si Dario Mangas Matigas, 47; Lloyd Penas Singculan, 45, ug Joselito Almacen, 41, taga Poblacion, Dakbayan sa Danao.

Nasakmit gikan sa mga dinakpan ang 20 ka gagmay nga pakete sa gituohang shabu nga mokabat sa P13,000 ang kantidad ug laing P650 nga salapi nga gituohang halin.

Dili pa sab dugay nadakpan ang kabanay ni Barok nga si Charles Alvaro Murillo kauban sa lain pang lima nga nagtingkagol na sa detention cell sa Danao City Police Station. (BANAT NEWS)