Nanglungkab may kunsabong Maranao

CEBU, Philippines - Nadakpan na ang gitumbok nga suspek sa pagpanglungkab ug pagpangulata sa usa ka sinaligan sa St. Joseph Patriarch Parish, sa Mabolo, Dakbayan sa Sugbo niadtong Lunes.

Matud sa direktor sa Cebu City Police Office, Senior Supt. Joel Doria, nga nakuhaan ang suspek og kwarta nga balor og P214 mil ug 146 dolyar.

Ang suspek giila nga si Alexander Lumapac nga maoy nikulata sa kanhi madre ug karon sinaligan na sa mga donasyon  sa simbahan nga si Roxane Valmoria.

Asoy sa bag-ong hepe sa Mabolo Police Station nga si Supt. Emelie Santos, nga nakadawat sila og tawag gikan sa Mambaling Police Station nga dunay usa ka barangay tanod nga nakakita sa maong lalaki sa dalan F. Llamas.

Daling girespondehan sa Mambaling Police inubanan sa Mabolo Police lakip na ang barangay tanod sa Mambaling ug San Nicolas.

Nasuta nga dunay boarding house sa maong lugar ang suspek ug matud pa nga nakapamalit na kini og mga bag-ong butang sama sa flat screen TV, sofa bed, electric fan, motor ug mga butang sa kusina.

Dihang nadakpan, gibutyag ni Lumapac nga duna siyay kakunsabo sa pagbuhat sa krimen nga duna lay pangan nga Marwi, usa ka Maranao nga nakaila lang niya sa gawas sa simbahan.

Nitug-an kini nga nagkita ang duha sa Plaza Independencia aron sabotan ang maong pagpanglungkab.

Ang giangkong kalambigitan lang ni Lumapac mao ang paghimo og sketch ug matud pa nga si Marwi na ang nibuhat sa krimen.

Matud pa nga manglarga unta silang duha ni Marwi kagabii paingon sa Mindanao kun wala pa siya nadakpi.

Dihang gisubay sa kapolisan   ang usa ka Roxane Demecillo Bustamante, 22, kinsa gituohang hinigugma sa suspek, nasuta nga gihatagan kini og P15,500, matud sa hepe.

Si Lumapac giingong gipaeskwela sa maong simbahan apan sa dihang gipangutana kini sa kapolisan, si Santos niingon nga gilimod niya kini ug niingon nga usa siya ka gradwado sa marine engineering ug nagpasagop sa simbahan og tulo ka semana tungod kay nasakit kini.

Isip pagbayad sa utang kabubut-on, nagtabang-tabang kini sa maong simbahan, sumala pa ni Santos.

Iya sab gidugang nga walay kaso sa rekord ni Lumapac ug matud pa nga nabuhat lang kini niya tungod kay gikinahanglan niya ang kwarta nga pangbayad sa boarding house.

Samtang si Doria niingon nga pang-ukayon ang mga CCTV camera sa lugar diin giingong nagkita si Lumapac ug Marwi aron mapamatud-an nga tinuod kini nga duna siyay kakunsabo.

Kasong robbery una ang gipasaka batok ni Lumapac tungod kay wala pa madawat sa kapolisan ang medical certificate ni Valmoria aron masuta kun unsay dugang ipasaka batok sa suspek human sa iyang gihimong pagpangulata sa biktima. (BANAT NEWS)