Nag-leak sa intel report silotan, matud sa PRO-7

CEBU, Philippines - Si Police Senior Inspector Reslyn Abella, Information Officer sa Police Regional Office-7 mibutyag nga kasamtangan pang giimbestigahan sa kadagkuan sa PNP kung kinsa ang tinubdan sa hulagway sa memo sa kapulisan nga nag-ingon nga adunay giplanong pagpamomba ang mga sakop sa Maute sa nagkadaiyang pampublikong lugar.

Apan giklaro sa maong opisyal nga walay kalabutan ang Rehiyon-7 sa maong pagpakatap sa maong hulagway.

Butyag ni Abella nga adunay dakong tulubagon kung kinsa man ang tinubdan sa maong hulagway ug matud pa nga kung masuta nga usa ka pulis mismo ang tinubdan niini, pasakaan nila kini og kasong administratiba.

“Sa organization if it is legitimate information nga memorandum or document and mogawas siya without clearance from the higher authorities, naa gyud siya’y tulobagon. Admin Case especially if it is restricted or confidential in nature,” si Abella miingon.

Giangkon ni Abella nga dakong hagit kanila ang kapaspason sa teknolohiya ilabi na sa social media diin mas mauna pa mogawas ang mga impormasyon didto bisan pa man og wala kini kamatuoran o maberipika.

Apan matud pa niya nga ilang pirming ipahinumdom sa kapulisan nga dili tanang impormasyon nga maabot kanila mamahimong ipanghatag sa publiko tungod kay kinahanglan pa kini i-verify sa kadagkoan ilabi na sa intelligence units.

Dugang sa maong opisyal nga paabuton lang unta ang anunsyo sa ilang buhatan alang sa ilang kaayuhan.

Giawhag ni Abella nga dili unta mag-panic dayun ang mga tawo kung ganing makadawat og mga ingon niini nga mga impormasyon tungod kay wala kini mahimong kaayohan sa publiko.

Samtang gitigom ni Talisay City Mayor Eduardo Gullas ang 22 ka barangay kapitan ingon man mga opisyales sa city hall nunot niining maong hulga.

Giimbitar usab ang mga representante sa militar aron makahatag og dugang impormasyon.

 Matud pa ni Gullas, ang mga kapitan ug mga opisyales sa barangay maoy adunay dakong papel niining mga hulga sa terorista kay sila may naa sa lugar. (BANAT NEWS)