Purok System gihimo sa mga siyudad ug kalungsuran

CEBU, Philippines - Ang purok system gihimo sa mga siyudad ug kalungsuran sa Lalawigan sa Sugbo isip hinagiban alang sa kalinaw ug kahapsay, ingon man sa kampanya batok ilegal nga drugas.

Gipasigarbo sa mga mayor nga mitambong sa Convergence of Mega Cebu Leaders niadtong miaging adlaw nga ilang gi-adopt ang sistema sa purok.  Gani matud ni Liloan Mayor Christina Garcia Frasco nga "alive" o buhi gyud ang iyang lungsod nga adunay 28 ka purok.

Matud ni Mayor Frasco nga matag semana, kada purok maghimo kini og coastal ug highway clean-up sa mga subdivision.

Samtang ang 1,900 ka drug surrenderees gipatabang kini sa community service.

Si Consolacion Mayor Theresa Alegado miingon nga tungod sa maong sistema, sayon nalang sa pag-coordinate sa kalinaw ug kahapsay sa matag purok sa ilang lungsod.

Dugang niya nga epektibo usab kini sa gubat batok ilegal nga drugas. Sa iyang bahin, si San Fernando Mayor Lakambini Reluya nagkanayon nga sa ilang purok system, ang ilang prayoridad mao ang pagpalambo sa kinaiyahan ug ingon man ang kalinaw ug kahapsay sa lungsod.

Si Carcar City Mayor Nice Apura miingon nga iya na sab gi-activate ang maong sistema batok sa kampanya sa ilegal nga drugas sa ilang siyudad. - /DILT) (BANAT NEWS)