Managsuon gitadtad og bala
CEBU, Philippines - Gitadtad og bala ug nangamatay ang duha ka managsuon gawas sa ilahang balay diha sa St. Michael’s Village, Barangay Pajac, Dakbayan sa Lapu-Lapu kagahapon sa kaadlawon.
Si Senior Police Officer 2 Allan Pantaleon, imbestigador sa Lapu-Lapu City Police Office- Homicide Section miila sa mga biktima nga sila si Sonalia Dayongan, 25, ug igsuon niini nga si Sadam Dayongan.
Nasayran sa kapolisan nga sa wala pa nahitabo ang insidente, si Sadam nananghid sa iyahang amahan Sabado sa gabii nga iyang ibaligya ang traysikol kay gusto na kini mobalik sa Mindanao aron mag-negosyo didto.
Si Sadam mipauli sa ilaha ug gikauban iyang asawa nga si Nonida, ilahang duha ka gagmay’ng anak, ug iyang igsuon nga si Sonalia ug samtang namahuway kalit gibato ang ilang balay og plastic nga botelya nga adunay sud nga bas.
Nigawas si Sonalia ug si Sadam apan gisugat sila og bala sa wala mailhing mga mamumuno.
Nakuha sa crime scene ang upat ka kabhang gikan sa .45 nga bala, laing lima ka kabhang sa .9mm ug duha ka deformed slugs.
Way silingan sa mga biktima nga nakabantay kun adunay motor nga nisud sa ilang lugar.
Wa pa matino sa kapolisan kung unsa gyud ang motibo sa maong pagpatay apan aduna na sila’y pagduda nga posibleng adunay nakaatraso si Sadam maong gusto niining mobalik sa Mindanao. - /EIM) (BANAT NEWS)
- Latest
