Tom: Kinahanglang ibalik ang PNP kontra drugas
CEBU, Philippines - Kinahanglan gyud nga ibalik ang kapolisan sa kampanya kontra ilegal nga drugas tungod kay dili kayahon sa Philippine Drug Enforcement Agency ang kampanya kun kuwang sila og tawo.
Sa pagsuspenso sa partisipasyon sa kapolisan sa kampanya batok sa ilegal nga drugas usa si Cebu City Mayor Tomas Osmeña sa mga nasagmuyo.
Apan sayo niining semanaha, si Pres. Rodrigo Duterte mipahibalo nga kinahanglang ibalik ang kapolisan sa kampanya tungod sa pagbalik na usab sa mga drug pushers sa ilang pagpamaligya og drugas sa kadalanan.
Si Osmeña nagkanayon nga bisan gani sa Amerika nga kompleto sa kahimanan naglisod sa pagpuo sa maong problema.
Gidayeg hinuon sa mayor ang maayong trabaho sa Philippine Drug Enforcement Agency (PDEA)-7 apan matud niya dili paigo ang pwersa sa maong ahensiya aron pagdakop sa tanang mga drug personalities sa siyudad.
Adunay mga programa nga giandam ang mayor aron batukan ang ilegal nga drugas nga buot niyang ipaabot sa presidente.
Pipila sa mga programa nga giandam niini mao ang pagbutang og 100 canine sniffing dogs, dormitory ug full time handlers nga drug dependent aron nga aduna silay kauban kay sagad kanila kuwang sa pagtagad.
Buot usbon sa mayor ang Senior Citizens Center diha sa Kawit Island ug diha na ibutang ang catering services sa siyudad, mag-abli usab og restaurant aron anha motrabaho ang mga drug dependents.
Matud ni Osmeña sukad gisuspenso ang Anti-Drug Operation sa PNP mibalik og siaw ang drugas sa siyudad. Giangkon ni Osmeña nga dili gyud hingpit mawagtang ang problema sa ilegal nga drugas apan mahimo kining mamenusan.
“That’s the mind frame that I’m telling my people here in City Hall and even the public in general we do not solve problems but we work hand in hand, we’ll pick up the stones everyday so that we can assure that tomorrow would be better than today,” matud ni Osmeña. (BANAT NEWS)
- Latest
