Babaye napasok sa septic tank
![Babaye napasok sa septic tank](https://media.philstar.com/images/articles/balita1_2017-01-24_21-06-58.jpg)
CEBU, Philippines - Usa ka patay’ng lawas ang nakit-an nga napaslak sulod sa usa ka septic tank sa usa ka dakong tindahan diha sa Purok Mangga, Brgy. Canjulao sa Dakbayan sa Lapu-Lapu kagahapon sa hapon.
Nailhan ang patay’ng lawas nga si Jocelyn Berdin, 52, nagpuyo sa Purok Atis sa maong barangay ug gikatahong aduna kini deperensiya sa pangisip.
Ang ginang nagsul-ob og green nga shorts ug mubo kini og buhok, ug ang lawas niini, nanglagom na tungod sa pagkatuslob niini sa septic tank.
Nagkanayon si Police Officer 3 Joseph Rouel Cutanda, imbestigador sa Lapu-Lapu City Police Office- Homicide Section nga usa ka Darwin Sereno nga padulong na unta manglimpyo sa septic tank ang nakabantay sa lubot nga bahin sa patay’ng lawas sa alas 11 sa buntag kagahapon.
Daling naalerto si Sereno ug daling nanawag og tabang sa mga silingan niini. Usa ka paresan sa tsinelas ang nakit-an usab sa maong dapit matud ni Cutanda.
Sa dugang nga imbestigasyon ni Cutanda, Biyernes pa nawagtang ang ginang. Ang lawas ni Berdin gidala sa usa ka punerarya aron ipa-autopsy.
Sa pagkakaron, di pa makaingon si Cutanda kung adunay foul play ang nahitabo kay usa ka follow-up investigation pa ang ilahang buhaton sa mga mosunod nga mga adlaw. (BANAT NEWS)
- Latest