Clearance sa Ombuds, COA kinahanglan sa CICC

CEBU, Philippines - Nagplano si Gobernador Hilario Davide III nga mosuwat ngadto sa buhatan sa Ombudsman kabahin sa plano sa Probinsiya sa Sugbo nga ibaligya ang Cebu International Convention Center (CICC) ngadto sa kagamhanan sa Dakbayan sa Mandaue.

Matud ni Davide nga kinahanglan nga pahibaw-on ang Ombudsman ilabina nga adunay nag-ung-ong nga kaso karon sa CICC tungod sa giingong overpriced nga pagtukod niini.

Si Davide nibutyag nga aduna nay draft memorandum of agreement ang Kapitolyo ug ang Dakbayan sa Mandaue kabahin sa pagbaligya sa CICC sa kantidad nga P350 milyones.

Ang pagbayad ipaagi sa tagi-tagi ug dili tibuok nga kantidad ang ibayad ngadto sa Kapitolyo.

Si Davide nagkanayon nga kinahanglan usab nga pahibaw-on sa Kapitolyo ang Commission on Audit kabahin niini.

“Of course we need a COA clearance although para nako, not necessary kay this is a government to government construction, but we want that, kay naay agreement nga subject to COA rules on disposition of property,” matud ni Davide.

Ang administrasyon ni Davide walay plano nga mogasto sa pagpaayo sa maong edipisyo human kini naguba sa linog ug bagyo niadtong 2013 samtang nalambigit usab sa kontrobersiya ang pagtukod niini.