Tag P1,000 madawat sa seniors

CEBU, Philippines - Makadawat na sab og tag P1,000 ang 67,300 ka senior citizens gikan sa kagamhanan sa Dakbayan sa Sugbo karong adlawa.

Matud ni Domingo Chavez, pangulo sa Office of the Senior Citizens Affairs, nga P12,000 ang kinatibuk-ang madawat nga financial assistance sa mga senior citizens sulod sa usa ka tuig ug karon naa na sa P10,000 ang napangapod-apod.

Ang pangulo sa City Social Welfare and Development Office, Lea Japson, nagkanayon nga walay kausaban ang pagpangapod-apod tungod kay kung kinsa to ang distribution officers kaniadto mao ra gihapon ang mohatag niini karon.

Ang venue sa distribution anha lang gihapon sa mga pangpublikong tunghaan sanglit dili man mabalda ang klase kay natunong man nga walay klase ang mga tinun-an.

Subling giklaro ni Japson nga walay private individual nga gitudlo nga maoy mohatag sa hinabang pinansyal dungan sa pagbutyag nga ang mo-distribute gikan sa City Hall ug kadtong pribadong indibidwal igo lang motabang sa paghan-ay sa mga gikinahanglan.

Ang nahabiling P2,000 sa kinatibuk-ang kantidad gikatakda nga usahon na sa paghatag sunod buwan. (BANAT NEWS)