Liloan may ordinansa pag-rescue sa kabataan

CEBU, Philippines - Gihan-ay sa kagamhanan sa Lungsod sa Liloan ang mga kondisyon labot sa pagluwas sa kabataan nga nalambigit sa ginadiling drugas aron sila maprotehian.

Si Mayor Christina Frasco niaprobar niadtong Septiyembre 28, 2016 sa duha ka ordinansa nga gipangamahanan ni Konsehal Vidal Cañete, usa ka semana human kini napasar sa Sangguniang Bayan.

Ang rescue operation gitugot kung ang bata anaa sulod sa drug den, aktong naghupot o naggamit og ilegal nga drugas, aktong namaligya, gituohang sabog nga nagsuroy-suroy, kuyog sa mga tawong namaligya ug naggamit, o nagpuyo sa pamilya nga nalambigit sa ginadiling drugas.

Gitukod usab ang rescue team nga gipangulohan sa Municipal Social Welfare and Development Officer ug Municipal Health Officer samtang ilang mga sakop ang hepe sa Philippine National Police (PNP) Women and Children’s Desk, punong barangay, ug representante sa non-government organization nga naglihok alang sa children’s rights and welfare.

Buwag nga ordinansa ang gipasar alang sa Anti-Delinquency and Substance Abuse Program isip tubag sa nagkadaghang kalapasan nga nahimo sa kabataan ug mga gangs ug pseudo fraternities may kalambigitan gihapon sa ilegal nga drugas.

Ang Municipal Social Welfare and Development Office (MSWDO) gitahasan sa pagpatuman og mga programa nga makatabang sa kabataan nga malikay sa mga kasaypanan dili lang sa usa ka lugar apan sa tibuok komunidad.

Kini naglakip sa holistic, academic, home visitation ug head start programs. (BANAT NEWS)