Coastal road sa Cordova humana
CEBU, Philippines - Ang mga mananagat sa Lungsod sa Cordova dili na mag-antus sa paglakaw sa lapokon nga karsada ug dili na usab matunok sa mga bildo karon nga nahuman na ang coastal road project sa probinsiya ug sa lokal nga kagamhanan.
Nikabat sa P8 milyones ang gasto sa proyekto nga gitungaan sa Kapitolyo ug sa Lungsod sa Cordova.
Ang coastal road adunay gitas-on nga 520 metros nga nagsumpay sa Barangay Camolinas, Poblacion ug Alegria.
Si Gobernador Hilario Davide III nagkanayon nga ubos sa visionary leader nga sama kang Mayor Adelino Sitoy nagtuo siya nga padayon ang paglambo sa lungsod ug may purohan nga mahimo kini’ng siyudad.
Sa laing bahin, ang kagamhanan sa probinsiya padayon sa ila’ng paghatag og mga infrastructure projects sa Cordova alang sa katumanan sa plano nga mahimo’ng gateway sa mga langyaw ug lokal nga turista kinsa gusto’ng mosuroy sa mga silingan nga mga isla.
Si Sitoy nibutyag nga giaprobahan na sa gobernador ang P5 milyones nga financial assistance alang sa road concreting sa San Miguel.
Si Davide nisaad sa padayong paghatag og pinansiyal nga tabang alang sa kalamboan sa Cordova ug mosuporta usab siya sa katukuran sa taytayan nga magsumpay sa lungsod ug sa Dakbayan sa Sugbo. (BANAT NEWS)
- Latest
