Cell sites sa Apas naa gihapon
CEBU, Philippines - Nagpadayon gihapon ang operasyon sa cell sites sa Sitio Calvary, Apas, Dakbayan sa Sugbo bisan pa man sa kamanduan ni acting Mayor Edgardo Labella sa pagpahunong niadto’ng Enero 5.
Buot ni Labella nga sugod karong adlawa dili na unta padayonon ang operasyon ug mosunod sa mando sa kagamhanan sa dakbayan alang sa kaayuhan sa kadaghanan.
Kagahapon gibisita ni Labella ang lugar aron pagsuta sa reklamo sa mga residente. Gibutyag niya nga nakadawat siya sa suwat sa Sun Cellular diin nangayo kini og unom ka buwan nga extension aron pagpangita og lugar nga kabalhinan.
Si Labella niingon nga posible’ng dili niya paboran ang hangyo.
Moluwat si Labella og kamanduan sa Prevention, Restoration, Order, Beautification and Enhancement (PROBE) Team aron maseguro nga ma-deactivated gyud ang operasyon sa mga cell sites tungod sa risgo nga gihatag niini sa panglawas sa mga residente.
Si Barangay Apas Kapitan Ramil Ayuman nagkanayon nga porsigido gyud sila nga matangtang na kini human kapin 20 na ka residente ang nangamatay sa sakit nga cancer nga posible’ng nakuha gikan sa radiation sa cell sites.
Sa Martes makigtagbo si Labella sa Calvary Hills Homeowners Association, opisyal sa barangay ug representante sa Sun ug Globe Telecoms aron hisgutan na ang pagtang-tang sa cell site. (BANAT NEWS)
- Latest
