Mitikig sa hotel

CEBU, Philippines - Patay na nga nadangat sa tambalanan ang usa ka negosyanteng lalaki, human kini gituohang giataki sa iyang sakit samtang nag- check-in sa usa ka hotel diha sa North Reclamation Area sa Brgy. Carreta ning Dakbayan sa Sugbo sa nakalabay nga hapon.

Gipugngan sa Banat News ang pangalan sa 36-anyos nga namatay apan giingong kini taga Mindanao ug nagnegosyo og lawog sa hayopan.

Matud pa ni Senior Police Officer 3 Felomino Mendaros , imbestigador sa Homicide Section sa Cebu City Police Office nga nahinabi sa Banat News, mi-check in kini sa maong hotel pasado alas-8 sa gabii niadtong Enero 31.

Pagka petsa uno ning bulana, gipahibalo kini sa hotel staff nga mapupos ang oras sa iyang giabangang lawak, apan giingong kini miingon nga mo-extend pa kini og kadiyot.

Matud pang Mendaros, pasado alas 11 sa buntag adunay duha ka mga babayeng nangabot sa hotel kay mobisita sa negosyante ug human mikompirmar kini nga duna kini gipaabot gipasud ang duha sa lawak.

Pipila ka minutos nga milabay usa sa mga babaye ang migawas apan nagpabilin ang usa sa lawak.

Apan pagkaala-una sa hapon, nagkaratol-ratol nga nangayo og tabang ang nahibilin nga babaye kay nakuyapan ang iyang kauban sa sud.

Si Mendaros miingon nga ang manager sa maong hotel mitug-an nga ang babaye miingon nga kalit lang naglisod og ginhawa ang maong negosyante maong gitabang ug gidala sa usa ka pribadong tambalanan.

Sa pag-abot sa kapulisan sa hotel wala na sila’y nahipos nga magamit nga ebidensyang posibleng makatabang pagsubay kun unsay nakaingon nga giatake kini sa sakit ang maong guest tungod kay gilimpyohan na kini sa hotel staff. (BANAT NEWS)