Gipatay sa duha ka tulisan

CEBU, Philippines – Gipatay sa tulisan ang kawani sa usa ka outlet nga namaligya og burger diha sa Brgy. Opao, Dakbayan sa Mandaue kagahapon sa kaadlawon.

Si Alvin Andales, nakaangkon og pinusilan sa iyang tiyan ug gideklarar nga patay na pag-abot sa Mandaue City Hospital.

Si Andales, lumolupyo sa Brgy. Lamac, Consolacion maoy nagbantay sa Angel’s Burger Machine nga nahimutang sa Brgy. Opao.

Usa ka kustomer sa burger machine nga si Johanne Lepiten, 22, taga Barangay Opao, Mandaue  nga nakahinabi sa Banat News mibutyag nga nakuha ang iyang bag dihang gitionan siya’g 45 kalibre nga pistola sa tulisan. Matud ni Lepiten nga pag-abot nila sa maong tindahan diha na ang tulisan kauban ang usa ka babaye, apan wala sila masayod nga nanulis diay ang duha sa maong tindahan. Si Lepiten mitug-an sa kapolisan nga ang kaubang babaye sa tulisan nagbarog ra duol sa pultahan sa tindahan.

Mo-order na unta si Lepiten kang Andales dihang giduol sa tulisan ang iyang amigo ug gitionan og armas ug nideklarar og tulis, apan walay ikahatag iyang amigo.

Naigking na lang si Lepiten dihang kalit gipusil sa maong tulisan si Andales nga diha ra sa sud ug pagkahuman giduol siya niini ug mao na say gitionan og armas ug gikuha iyang shoulder bag. Ang bag adunay sud nga cash nga P1,000, duha ka ATM Card, cellphone nga mibalor og P10 mil, Pocket Wi-fi, camera ug charger.

Ang mga tulisan misibat luwan sa usa ka itom nga motorsiklo. – /RUB) (BANAT NEWS)