Most wanted napatay

CEBU, Philippines - Wa maabti og 2016 ang gitumbok nga Number 1 Most Wanted sa kapolisan sa San Francisco sa Camotes Island sa nahitabong pinusilay tali kaniya ug sa mga sakop sa Provincial Intelligence Branch (PIB) sa Cebu Provincial Police Office.

Ang engkwentro nahitabo atol sa paghatud unta sa mga polis sa warrant of arrest sa kaso sa ginadiling drugas diha sa iyang balay sa Sitio Cambat-an, Barangay Santa Cruz sa maong lungsod sa nakalabay nga hapon.

Ang napatay  mao si Alex Otida,  gitumbok nga notadong drug pusher sa maong lungsod ug nalambigit usab sa gun for hire business.

Samtang gikostudiya sa kapolisan ang kapuyo niini nga si Cheryl Ramirez, 24, aron ipaubos sa imbestigasyon.

Atol sa binakbakay, naangol si Police Officer 3 Anthony Adizas human naigo sa bala ang puloan sa iyang pistola nga milapos sa iyang tuo nga kamot.

Sa paghinabi sa Banat News kang Adizas kini miingon nga plywood ray nag-ulang kaniya ug sa suspek kinsa diha sud sa lawak niini dihang silang duha nagkapinusilay.

Apan swerte lang gyud nga sa pagsige og rapido sa plywood sa suspek gamit ang iyang KG-9 Sub machine pistol nakaatras og gamay si Adizas  ug ang iyang ka-buddy nga nakigpinusilay usab sa suspek.

Matud niya, sa pagsud niya sa lawak, nakita dayon niya ang suspek nga nagkupot og KG-9. “M4 (assault rifle) ang gibitbit nako, pero pagbuto-buto lisod man ang M4 mao to migamit ko sa secondary nga armas nako.

Didto na ang pinusilay kay gipalapos ra man niya pagpusil sa plywood nga gitaparan namo,” matud pa ni Adizas.Wala magtuo si Adizas nga sa kamot lang kini naigo atol sa pinusilay kay mohadyong man sa iyang ulo ang mga bala gikan sa plywood matag rapido. “Kadtong pagrapido niya murag usa ka atras ra siguro naku mihadyong na ang bala sa akong ulo. Sa mga na-engkwentro nako nga raid kini siya ang pina kursonada mopatay og pulis,” dugang pa ni Adizas.

Anha lang nakabantay si Adizas nga naigo siya sa bala dihang di na mobuto iyang armas kay naabtan diay og usa ka bala iyang kamot ug nilapos diha sa magazine ang bala hinungdan sa pagtangtang  sa kuko sa iyang usa ka tudlo ug nabuslot iyang palad.

Alang ni Adizas bag-o kini nga kinabuhi ang gihatag kaniya sa Ginoo ug isipon niya kini nga pinakanindot nga pinaskohan ug gasa kaniya ug sa iyang pamilya.

Si Otida gisulayan pa unta pagdala sa tambalanan apan nakabsan gayod kini sa  kinabuhi.

Nakuha sa iyang lawak ang usa   ka KG9 nga dunay 18 ka mga bala, duha ka 45 caliber pistols nga puno usab sa mga bala, daghang pinutos nga shabu nga mikantidad og P826, 118.

Si Supt. Rodolfo Albotra, hepe sa Provincial Intelligence Branch nga nahinabi sa mga tigbalita mibutyag nga gawas sa kaso sa drugas siya usab ang nipusil ug nakaangol ni PO1 Demar Muaña sakop sa San Francisco Police niadtong bulan sa Hulyo dihang ilang gironda ang iyang  balay nga gihimong drug den.

Atol sa maong hitabo naluwas si PO1 Muaña sa iyang selpon nga iyang gibutang sa dughan kay didto ra nalubong ang bala. Ning higayona, si PO3 Adizas naluwas usab sa iyang pistola.

Si Albotra miingon nga aduna pa’y laing mga kauban si Otida nga plano nilang sikupon.

Samtang ang ka live-in sa suspetsado mipadayag sa Banat News nga napugos kini pakig-ipon ni Otida kay gihulga man siya niini kaniadto, giangkon usab niya nga namaligya og drugas ang kapuyo  ug gitug-anan siya niini nga daghan na kini og gipatay.  (BANAT NEWS)