Factory worker gipatay

CEBU, Philippines - Patay ang usa ka factory worker dihang gipusil kini sa ulo ug sa uban pang bahin sa iyang kalawasan diha sa dalan Plaridel, Barangay Alang-Alang, Dakbayan sa Mandaue alas 6 pasado ang takna sa buntag niadtong miaging adlaw.

Si Police Officer 2 Jayson Flores sa Presinto 1 sa Mandaue City Police Office (MCPO) miila sa biktima nga mao si Francis Cabido.

Matud pa ni Flores, migawas ang biktima sa pabrika ug naglingkod daplin sa karsada dihang nahiagi ang duha ka wala hiilhing mga lalaki nga naglakaw ug gipusil kini sa  ulo ug gitiwasan pa pinaagi sa pagpusil sa kalawasan ug yanong nipalayo sa dapit.

Nakuha sa crime scene ang lima ka mga kabhang sa bala nga kalibre .45 ug duha ka mga deformed slugs nga ilang gituohan nga gikan kini sa armas sa wala pa hiilhing mamumuno niini.

Ang Investigation Detection and Management Bureau (IDMB) sa MCPO wala pa ka tino sa motibo sa pagpatay. - /EIM (BANAT NEWS)