Balay gisunog sa manghud sa tag-iya
CEBU, Philippines – Naugdaw ang usa ka balay human gisunog sa lalaki nga gituohang may deperensiya sa pangisip sa sitio Lamacan, Valencia, lungsod sa Alegria ala una sa nakalabay nga hapon. Ang balay nga nasunog gipanag-iya ni Oscar Amatiaga, 41, mag-uuma, samtang suspek sa hitabo ang iya’ng manghud nga si Marvin Amatiaga, 38.
Matud ni PO2 Lenard Cabahug, desk officer sa Alegria Police, nga mismo ang igsuon ug ang ginikanan sa suspek nikompirmar nga duna’y problema sa pangisip ang suspek.
Ang sunog nagbilin og P5,000 nga danyos.
Pasado alas 4 na sa hapon nadakpan sa kapolisan ang suspek apan gi-turnover sa Municipal Social Worker human nasayri nga may problema sa pangisip.
Ang kapolisan nitambag sa pamilya nga dalhon sa sakto’ng tambalanan ang suspek aron dili na kini makahimo pa og laing krimen. – /GMR) (BANAT NEWS)
- Latest
