Quarry sa Sapangdaku nagpadayun
CEBU, Philippines - Nagpadayun lang gihapon ang pagpangubkob sa bas ug graba sa Sapangdaku River sa dakbayan sa Toledo bisan pa sa moratorium nga gipatuman sa lokal nga kagamhanan.
Si Atty. Chad Estella, pangulo sa Provincial Environment and Natural Resources Office (PENRO), nipasabot nga posible’ng may daan pa nga delivery receipts (DL) ang mga operators tungod kay nakatingub kini og bayad.
Matud ni Estella nga kung mahurot na ang maong DL dili na gyud sila maka-deliver o makabiyahe og bas ug graba.
Karong Lunes gipatawag sa hunta probinsiyal sa Sugbo ang mga quarry operators sa Sapangdaku.
Matud ni Estella nga kabahin sa rehabilitasyon sa Sapangdaku ang posible’ng hisgutan sa tigum.
Ang mga quarry operators hatagan usab og higayun nga makapadayag sa ilang habig.
Ang Sapangdaku nakaangkon og grabe’ng kadaut tungod sa quarry operation ug nakahatag kini og peligro sa mga residente sa lugar.
Ang Mines and Geosciences Bureau ang mo-isyu og permit sa “large scale quarry” samtang ang Kapitolyo ang mo-isyu og DL sa “small scale quarry.” (BANAT NEWS)
- Latest
