City Admin Tan ni-resign na sa pwesto

CEBU, Philippines — Hingpit na nga mi-resign na si Engr. Albert Tan isip City Administrator sa Kagamhanan sa Dakbayan sa Sugbo.

Gikumpirma kini ni Cebu City Mayor Nestor Archival pinaagi sa usa ka ekslusibong phone interview sa Banat News kagahapon, Oktubre 6, 2026.

Matud pa ni Archival nga misumiter og resignation letter si Tan sa iyang buhatan niadtong Lunes sa hapon, Oktubre 5.

Wala gisaysay sa mayor ang unod sa suwat apan gidawat niya ang desisyon ni Tan nga hingpit na niining biyaan ang iyang posisyon isip City Admin human sa 15 ka buwan.

Kahinumduman nga nagpagawas si Archival og Memorandum No. 2026-00621 niadtong Setyembre 18 nga nagtudlo kang Atty. Briccio Joseph Boholst isip Acting City Administrator samtang nagpadayon sa iyang katungdanan isip City Attorney sa City Legal Office tungod kay gitugutan kini niya nga mag-vacation leave si Tan.

Sa panahon nga nagbakasyon si Tan, gipaubos kini og imbestigasyon tungod sa reklamo nga may kalambigitan sa Bids and Awards Committee (BAC).

Gisuwayan sa Banat News nga mokuha og habig kang Tan apan nagdumili una kini sa pagtuki sa iyang pag-resign sa katungdanan. Buot niini nga ang mayor mismo ang mopahibalo sa iyang pagkanaog.

Gipahibalo sab ni Archival nga ipahibalo niya sa publiko nga ang mohulip ni Tan mao si Boholst ug si Atty. Eleodoro Diaz IV mao ang mahimong City Attorney kinsa mao sab ang City Attorney sa administrasyon kaniadto ni Bise Mayor Tomas Osmeña. — IBM BANAT NEWS