Lalaki nag-amok, tulo naangol
CEBU, Philippines - Tulo ka tawo ang nalandig sa tambalanan ug duha niini kritikal human nag-amok ang ilang silingan nga gituohang nagumon sa ilegal nga drugas diha sa Sitio Sun-ok, Barangay Tayud lungsod sa Consolacion.
Ang nangaangol mao sila si Danilo Anoos, 36, Evelyn Quiseo, 46 pulos nagpuyo sa maong barangay ug Jose Ibali, 46, taga Yati, Liloan, samtang ang suspetsado giila nga si Roberto Abucay, 28.
Matud pa ni Police Officer 1 Ritchie Gilleran ang desk officer sa Consolacion Police nga nahinabi sa Banat News ang mga paryente sa suspetsado mibutyag nga nagkadeperensya kini sa pangisip tungod sa illegal drugs.
Sumala pa ni Gilleran nga sa wala pa nahitabo ang pagpanigbas nagsige na og yawyaw ang suspek nga iyang pamatyon ang iyang ginikanan.
Wa nila mabantayi nga nakakuha na diay kini og sundang ug migawas sa balay ug gipanigbas ang mga tawo nga iyang makit-an.
Unang giatake ni Abucay si Anoos, sunod si Quiseo nga nagtabyog sa iyang anak diha sa ilang balay ug pagkahuman gitigbas niini si Ibali nga nanguryoso sa komosyon. Ang mga biktima pulos natigbasan sa mga ulo ug likod. Ang mga paryente sa suspek nagtinabangay paglayog kaniya ug gi-turnover sa mirespondeng mga polis. (BANAT NEWS)
- Latest
