Wanted nga langyaw nadakpan

CEBU, Philippines - Usa ka US citizen apan natawo sa Afghanistan nga duna’y standing warrant of arrest gikan sa iyang nasud tungod sa pagpanglugos ang nasikop sa kapolisan kagahapon sa kadlawon didto sa gipuy-an niini nga apartment sa Barangay Sambag 1 ning dakbayan sa Sugbo.

Si Shikeb Saddozai, 37, didto madakpi sa Sitio Kalubihan, Sambag 1 ug gikatakda nga dad-on pagbalik sa Estados Unidos aron paatubangon sa iyang mga kaso.

Si Sr. Supt. Conrad Capa, deputy director for operations sa Police Regional Office -7 ug acting chief sa Cebu City Police Office (CCPO), miingon nga atol sa pagdakop ni Saddozai misukol pa g’yud kini sa mga polis apan nadakpan g’yud siya sa mga sakop sa Special Weapons and Tactics (SWAT) team.

Matud ni Capa nga ang maong Afghan nadakpan na unta kaniadto sa mga US Marshall didto sa Estados Unidos apan nakaikyas human niya sumbaga ang midakop kaniya ug misibat kini sa America ug dinhi mitago sa Sugbo.

Gisikop si Saddozai human ang Bureau of Immigration (BI) mipagawas og warrant of deportation sa suspek.

Duna’y upat ka standing warrants of arrest ang maong langyaw kabahin sa pagpamugos og sex sa mga menor de edad, kidnapping, false imprisonment ug sexual battery.

Sigun pa ni Capa nga ang mga sakop sa National Bureau of Investigation (NBI) ug Bureau of Immigration misulay unta og dakop sa suspetsado niadto’ng miagi’ng tuig didto sa iyang gipuy-an nga condominium sa Barangay Mabolo apan nakaikyas.

Apan ang kapolisan nakabantay nga ang suspetsado diha sa Barangay Sambag 1 magpuyo ug ila kini nga gipanid-an ug gisiguro kun mao ba kini ang gipangita sa balaod.

Si Capa kauban ni CCPO deputy chief for operation Supt. Arnel Banzon, deputy chief sa PNP Regional Intelligence Rex Derilo, CCPO Station 2 chief Wildemar Tiu, Chief Insp. Mark Sucalit sa RID-7 ug mga sakop sa SWAT team ang miadto sa gipuy-an ni Saddozai.

Pag-abot sa kapolisan natulog pa ang suspetsado ug dali nila kini nga gidakop bisan og misuway na usab unta pagsukol.

Si Capa mipasabot nga ikaduha na kini nga higayon nga nagmalampuson ang kapolisan sa PRO-7 pagdakop og usa ka langyaw  nga pinangita sa balaod sa ilang nasud nga dinhi sa Sugbo nagtago-tago.

Niadto’ng miagi’ng tuig nadakpan ‘sab sa kapolisan si Robert “Musa” Cerantonio, usa ka radical nga cleric nga nasikop sa dakbayan sa Lapu-Lapu. Sumala pa ni Capa nga gituyo sa suspetsado nga dinhi sa dakbayan sa Sugbo magtago-tago kay daghan man ang mga langyaw nga ania dinhi magpuyo.

Ang Afghan nakuhaan og laptop, cellphone ug mga salapi ug ila pa kini nga gisusi kun duna ba kini mga pornographic materials ug apil nga sutaon kun wala ba siya malambigit sa cyber pornography ug human trafficking. Ang suspek nga gitanggong karon sa bilanggoan sa CCPO Station 2 nagdumili pagpa-interview sa media.  (BANAT NEWS)