PNP nangandam sa transport strike

CEBU, Philippines - Andam na ang kapolisan sa dakbayan sa Sugbo sa gikatahong transport strike sa grupong PISTON karong Lunes.

Matud sa deputy director sa Police Regional Office-7, Sr. Supt. Conrad Capa, nga ang trabaho sa kapolisan mao ang pagseguro nga hapsay ang transport strike sa mga lugar nga ilang himoan sa kalihukan.

Sigun pa sa opisyal nga ilang gitahud ang demokrasya nga pamaagi sa nasud sa pagpadungog sa gobiyerno sa matag grupo.

Apan gipasabot ni Capa nga dili sab sila magpanuko og sikop sa mga transport leaders kun ugaling mamugos na kini sa mga kauban nila nga mamasahero ug dili gusto mo-uban sa ilang kalihukan.

Apil sa ilang gipahimangnoan kadtong mga mag-welga nga mopasakit sa ilang mga kauban kun dili mokuyog kanila. Gipasalig ni Capa nga dunay mga polis nga ipakatap sa nag-unang kadalanan sa dakbayan. (Jojo C. Ugdol/GMR)(BANAT NEWS)