Akusado sa lugos sa Bohol nasikop sa Sugbo

CEBU, Philippines- Gisikop sa kapolisan ang usa ka lalaki nga halos usa ka tuig na nga nagtago sa dakbayan sa Sugbo gumikan sa duha ka kasong incestuous rape ug sexual assault sa Doña Maria Village 1,Punta Princesa niadtong Sabado sa buntag.

Ang gisikop sa kapolisan mao si Melchor Petalcorin, 37, taga Candumayao, Catigbian, Bohol.

Matud ni PO1 Crisanto Cinco sa Punta Princesa Police Station nga nahinabi sa Banat News nga niadto pa’ng tuig 2013 nahitabo ang krimen nga pagpanglugos sa iyang kaugalingong anak.

Dunay nakatug-an sa kapolisan sa Bohol nga dinhi sa Sugbo nagtago-tago ang suspek hinungdan nga daling nakig-alayon ang kapolisan sa Bohol aron masikop si Petalcorin.

Sumala pa ni Cinco nga ang asawa sa suspek miuban pa sa kapolisan aron pangita-on ug masikop ang akusado.

Hinuon wala na mosulay og sukol ug sibat ang suspek pag-abot sa kapolisan sa iyang gipuy-an.

Gidala na sa dakbayan sa Tagbilaran ang suspek aron ma-atubang ang kaso sa korte. - /GMR) (BANAT NEWS)