UV molusad og CSR project sa Kamagayan

CEBU, Philippines - Ang  University of the Visayas  molusad karon sa  iyang corporate social responsibility project nga gitawag  og  “Green and White Tabang sa Silingan Program,” nga mohatag  og  kaayohan sa mga molupyo sa Kamagayan.

“Kining maong proyekto nahisubay sa prinsipyo sa pagtabang sa usa ka silingan. Hinungdan,  nga ang unibersidad motabang sa atong silingan, nga mao ang Barangay Kamagayan,” matud ni UV Executive Vice President Jose “Dodong”  R. Gullas.

Ang mga opisyal sa unibersidad mopirma karon sa usa ka memorandum of agreement uban sa mga opisyal sa Barangay Kamagayan alang sa implementasyon sa  nagkalainlaing proyekto nga sama sa panglawas  ug  sanitasyon, panginabuhi,  batok drugas  ug mga isyu bahin sa kalikopan.Ang nahisgutang  mga programa, nga molanat og duha ka tuig, ipatuman pinaagi  sa nagkalainlaing  kolehiyo  ug  mga departamento sa UV.

Mokabat sa 50 ka pamilya ang  makapahimus gikan  sa usa ka tuig nga kalihukan sama sa pagpakaon sa kabataan, lektura sa mga  ginikanan, edukasyon alang sa gagmay pang kabataan sa mga benepisyaryo maingon man sa mga batan-on  nga  wala na magtungha, edukasyon bahin sa druga, HIV ug  edukasyon sa panglawas , panginabuhi ug pagtukod og  mga hinlo nga pansayan  alang  sa mga benepisyaryo.May mga Misa usab  matag Domingo sa alas 11:00 sa buntag samtang  magpadayon pa  ang  maong programa. (BANAT NEWS)