2 motor nagsampok usa patay

CEBU, Philippines - Duha ka motorsiklo ang nagsampok sa kurbadahong dalan sa sitio Abuno sa barangay Tunghaan sa lungsod sa Minglanilla nga miresulta sa kamatayon sa usa sa mga drayber ug pagkaangol sa gikabangga niini.

Wala na makaabot pang buhi sa tambalanan ang drayber nga si Celo Bragat, 24, taga Sitio Lumbad sa barangay Lipata  sa samang lungsod tungod sa naangkong grabeng kadaot sa ulo ug kalawasan tungod sa panagbangga.

Samtang talandugon ang kahimtang sa gikadasmag niyang drayber usab sa motorsiklo nga si Nemberth Tampus, 29, taga San Vicente  mao gihapong barangay, giingong adunay pasahero si Tampus nga nakalingkawas atol sa aksidente.

Matud ni PO2 Vincent Alinabo sa Minglanilla Police Station, gikan sa highway ug mitungas paingon sa Upper Tunghaan si Bragat dihang gikabangga niini ang nagdulhog usab nga si Tampus.

Tungod sa panagsampok sa duha nangalagpot ang mga sakay sa mga motor apan mas nagrabehan si Bragat pagkalamba.

Gidala sa Minglanilla District Hospital ang duha  apan gideklarar nga patay na si Bragat. (/EIM)  (BANAT NEWS)