Anna Fegi A Valentine Concert

CEBU, Philippines - Siya ang tag-iya sa mananoy nga tingog nga mihugyaw na sa tibuok kalibutan. Siya garbo sa Sugbo nga gipakpakan sa nagkadaiyang mga nasud. Siya mihakot na og nagkadaiyang pasidungog gumikan sa iyang abilidad sa pag-awit sa daghan nang mga katuigan.  Siya lumad nga taga Lutopan, Toledo. Siya walay lain kundili si Anna Marie Fegi-Brown. Nasayran nga sa edad nga 16-anyos nahimong kabahin si Anna sa sikat kaniadto nga grupong Smokey Mountain ni Maestro Ryan Cayabyab. Dili usab malimtan ang iyang lima ka tuig nga pagkasakop sa ASAP sa ABS-CBN diin ang segment nga Versus nila ni Bituin Escalante kaniadto ang labing giatangan. Niadtong 2000, sa songwriting contest sa ABS-CBN nga Himig Handog, ang awit nga “Larawan” nga sinuwat ni Doji Simon ug giawit ni Anna maoy nahimong grand prize winner.  Mibalik si Anna sa maong songwriting competition pagka 2004 aron pag-awit sa kanta nga sinuwat ni Arnel de Pano ug subling nahimong grand -prize winner.

Si Anna usab nakaapil sa nagkadaiyang musical sama sa Jesus Christ Superstar, Rent, Rocky Horror Show ug Dreamgirls sa Manila ug sa Singapore.  Niadtong 2005, gipasidunggan si Anna isip "Best Female Singer in Bars and Lounges" atol sa Aliw Awards gumikan sa iyang self-produced nga shows nga mituyok sa iladong bars and lounges sa Manila.  Niadtong 2006 ug 2007, gipakpakan og maayo si Anna didto sa Hongkong Disneyland gumikan sa iyang performances ilabi na ang isip Nala sa Festival of the Lion King.  Human niini, mibalik siya dinhi sa Sugbo aron pagtapos sa iyang kursong  Bachelor of Arts degree in Mass Communication sa University of San Jose Recoletos niadtong April 2008, diin gipasidunggan siya isip  "Outstanding ETEEAP Graduate" ug "Outstanding Project Study."

Milibot pud si Anna sa nagkadaiyang kontinente sa kalibutan isip pambato nga singer sa nagkadaiyang mga barko sa Royal Carribean International gikan 2008 hangtud 2010. Gani gihatagan siya og special citation para sa "Filipino Recording Artists Championing the World of Cruise Entertainment" sa Awit Awards  2011.

 Ug karong February 14, sa mismong adlaw sa mga kasingkasing, diha sa wanangan sa Rainforest Park Cebu “The Tent” diha sa Panagdait, Mabolo, paambitan ni Anna ang iyang musika pinaagi sa “Anna Fegi, A Valentine Dinner Concert.”  Sa kantidad nga P750 per person, duna na kini libre nga panihapon, glass of Michels Wine ug usa ka rose ug mga chocolates. Usa ka produksyon sa M-Talent Events & Promotions (The Home of the Stars) nga gipanag-iya ni Aida Patana, magsugod ang nahisgutang dinner concert 7:30 sa gabii. Makauban ni Anna si   Monica Sacay nga produkto sa reality-show sa ABS-CBN kaniadto nga “Star Power”  ug cast pud sa “Baylo Ta” sa CCTN nga ubos gihapon sa M-Talent Events & Promotions, diin si Aida usab ang bida. Madungog usab ang nindot nga tingog sa Sugbuanong umaabot nga recording artist nga si Stephanie.