Gilas batok Qatar

CEBU, Philippines - Taas ang kompiyansa sa Gilas Pilipinas nga makompleto nila og daog ang group stage sa FIBA Asia Cup.

Ang Gilas moharong sa Qatar karong alas-9 sa gabii didto sa Nouhad Nawfal Sports Complex sa Beirut, Lebanon.

Ang Gilas nagbaton na og 2-0 win-loss record human sa laing dominante nila nga  kadaogan batok sa Iraq, 84-68 niadtong Biyernes sa gabii. Gipilde sab sa Gilas ang powerhouse China sa opening game, 96-87.

Sa ilang kadaogan batok sa Iraq, ang Gilas segurado na nga mosulod sa quarterfinals, apan gusto gihapon ni coach Chot Reyes nga maharos ang group stage aron  mabutang sila og nindot nga posisyon sa playoffs.

Bisan pa sa ilang duha ka sunod-sunod nga daog, si Reyes nabalaka gihapon ilabi na batok sa Iraq kay kinahanglan pa nila nga mohimo og bangis nga rally sa second half aron mabiyaan ang mas huyang nilang kaatbang.

Ang Qatar tagakunon na sa torneyo tungod sa ilang sunod-sunod nga kapildihan batok sa Iraq ug China.

Ang point guard nga si Terrence Romeo mao karon ang nahimong labing masaligan sa opensa sa nasudnong koponan diin siya ang topscorer. Apan kinahanglan sab siya og suporta  sa  key players sa Gilas sama nila ni Jayson Castro, Chris Standhardinger ug   shooters nga sila si Matthew Wright ug Roger Pogoy.