Batan-on gitigbas kay wa manghatag og mangga
CEBU, Philippines — Nadakpan ang 33-anyos nga lalaki human kini giingong nanigbas sa usa ka 19-anyos nga batan-on kay wala siya hatagi niini og mangga diha sa Sitio Ugan, Barangay Lutac, City of Naga alas 1 sa kaadlawon niadtong Lunes, Hulyo 13.
Ang biktima giila lang sa alyas nga John, 19, residente sa maong lugar, samtang ang suspek giila sa alyas nga Matias, 33, residente sa Sitio Sindulan, Barangay Tinaan, City of Naga.
Sa imbestigasyon sa City of Naga Police Station, nangayo og mangga ang suspek sa biktima alas 12:55 sa kaadlawon.
Apan wala mosugot ang batan-on i tungod kay ang punoan sa mangga iya sa iyang iyaan.
Nasuko ang suspek ug kalit gitigbas ang biktima gamit ang sundang. Wala maigo ang unang pag-atake kay napugngan sa biktima ang sundang gamit ang mangga nga iyang gidala.
Misulay pagdagan ang biktima aron makalingkawas, apan gigukod siya sa suspek ug gitigbas pag-usab.
Gisulayan na usab sa biktima nga pugngan ang pag-atake, apan natigbasan na sad siya sa wala nga bitiis.
Bisan pa sa samad, nakalingkawas ang biktima ug nakapangayo og tabang sa iyang mga paryente, samtang nakalayo ang suspek gikan sa lugar.
Alas 4 sa kaadlawon, nakadawat og report ang City of Naga Police Station gikan sa usa ka concerned citizen bahin sa nahitabong panigbas.
Gilusad dayon sa kapolisan ang hot pursuit operation nga miresulta sa pagdakop sa suspek sa Purok Talong 3, Barangay South Poblacion, City of Naga.
Ang suspek karon anaa na sa kustodiya sa City of Naga Police Station ug gipasakaan og kasong attempted homicide. IBM BANAT NEWS
- Latest
