Salisi Gang nadakpan
CEBU, Philippines — Unom ka bayot ug usa ka babaye ang nadakpan human gipasanginlang nangawat og cellphone sa sulod sa usa ka imnanan sa Pelaez Street, Barangay Kalubihan sa Dakbayan sa Sugbo niadtong Mayo 7, 2026.
Ang biktima nga gitago lang sa alyas nga “Glenn” usa ka lokal nga turista nga mibisita sa syudad. Ang pito ka mga suspetsado gipugngan ang mga panagalan sa Cebu City Police Office.
Base sa impormasyon sa kapulisan, midangop sa kapolisan ang biktima alas 10:00 sa buntag.
Sa pagpahigayon og build-up ug follow-up investigation ang Tracker Team sa Police Station 5 uban sa Investigation and Detective Management Unit (IDMU) nadakpan ang mga suspetsado sa alas 10:00 sa gabii.
Matud pa sa mga imbestigador positibong giila sa biktima ang grupo nga mao ang mga tawong nalambigit sa maong pagpangawat.Nasikop ang mga suspetsado sulod sa ilang giabangang kwarto sa usa ka pension house sa Barangay Kalubihan.
Didto usab narekober sa kapulisan ang gikawat nga Realme cellphone nga gibana-bana nga nagkantidad og P10,000.
Sa inisyal nga imbestigasyon, suma pa sa hepe sa CCPO nga si Police Colonel George Ylanan, modus sa grupo ang paglipat-lipat sa mga kustomer sa mga bars ug night entertainment establishment sa syudad.
Target nila ang mga langyaw ug lokal nga turista nga nangahubog na nga ilang amigohon ug kawaton ilang mga butang sama sa cellphone, bag, pitaka ug uban pang bililhong gamit.
Sagad sila maglihok sa mga bars sa Kasambagan, IT Park, Mango Avenue, Kamputhaw, Mabolo, Ermita, ug Duljo. — Nicholas Jon Malaga/IBM BANAT NEWS
- Latest
