Nagsumbagay atol sa Misa sa patay
CEBU, Philippines — Imbes nga malinawon nga panamilit sa ilang inahan nga nitaliwan sa laing kalibotan, kagubot hinuon ang nahitabo human magkasumbagay ang duha ka magsoon sulod sa simbahan atol sa Misa Requiem sa ilang inahan sa Barangay Mag-Atubang, lungsod sa Tuburan, niadtong Domingo, Nobyembre 15.
Matud ni PLt. Col. Rolan Aliser, information officer sa Police Regional Office-7 (PRO-7), dugay na nga adunay panagbangi ang duha ka magsoon bisan buhi pa ang ilang inahan. Sa dihang namatay ang ilang inahan, gusto unta sa duha nga makatambong ug makapanamilit sa kataposang higayon, apan naglalis naman hinuon ug nagkasinumbagay.
Daan ng nangayo og tabang ang pamilya sa kapulisan kay nabalaka silang magkagubot ang duha sa simbahan.
Dugang pa ni Aliser, adunay pipila ka mga tawo nga nakuyapan, nga posibleng tungod sa kahadlok sa nahitabong kagubot.
Wala pa matino kon adunay gisang-at nga kaso batok sa mga nalambigit sa insidente. (BANAT NEWS)
- Latest
















