Pag-ransack sa duha ka balay gipasusi

CEBU, Philippines — Mimando si Police Colonel Percival Zorilla, Provincial Director sa Cebu Police Provincial Office (CPPO) sa Argao Police Station nga palawman ang imbestigasyon sa insidente nga nahitabo sa Sitio Himongbongan, Barangay Taloot, Lungsod sa Argao nga diin pa matud pa adunay duha ka balay nga gi-ransack sa dili momenus napulo ka armadong tawo nga nagtaptap ug nagpaila matud pa nga miyembro sa PDEA niadtong Martes sa gabii, Abril 11.

Matud ni Police Major Windel Abellana nga ang Argao Police Station pinangulohan ni Police Major Ivy Bartolome nakig-alayon sa biktima sa maong hitabo human ilahang gi-report otoridad ang insidente.

Si Abellana miingon nga ilahang susihon ang tanang pamahayag aron maklaro gyud kun unsay nahitabo.

Matud pa ang unang balay nga gisulod  gikatahong gikawatan og multicab nga nagkantidad og P175 mil  ug duha ka motorsiklo.

Ang ikaduhang balay gikawatan og kwarta nga nagkantidad og P140,000, tulo ka cellphone, usa ka tablet ug motorsiklo.

Ang PDEA-7 kusganong mihimakak nga duna silay operasyon sa lugar ug nakig-alayon karon sa Argao Police Station aron mailhan ug madakpan ang mga tulisan.  (BANAT NEWS)