Transaksiyon sa MCWD nabalik na sa normal kagahapon

CEBU, Philippines — Nibalik na sa normal ang transaksiyon sa Metro Cebu Water District human sa nahitabong standoff niadtong Martes.

Samtang ang kagamhanan sa Dakbayan sa Sugbo andam motubag ugaling pasakaan sila og kaso diin gibarogan nila nga legal ang ilang pagsulod sa main office sa MCWD.

Matud ni Mayor Michael Rama nga mahimong mopasang-at og kaso ang MCWD kong aduna kini nakitang kalapasan nga nahimo ang kagamhanan sa Dakbayan sa Sugbo.

Si Rama nagkanayon nga adunay problema sa tubig hinungdan nga magpakabana sila niini ug giawhag niini ang mga suspendido nga mokanaog na lang kini sa ilang pwesto diha sa MCWD ug respetohon ang balaod.

Matud ni Rama nga angayang sundon ang kamandoan sa Local Water Utility Administration diin national kini nga ahensiya sa gobiyerno ug angayang wala nay lain pa nga manginlabot ug mag-apil-apil sa kasikas sa siyudad.

Samtang si Cebu City Administrator Collin Rosell nagkanayon nga igo lang sila’ng nisanong sa pagpangayo kanila og assistance sa LWUA aron mainstolar ang gitudlo nga acting general manager nga si Atty. John Dx L apid kinsa ni-resign usab dayon sa maong katungdanan. Si Rosell nihimakak kini sa pasangil nga gilungkab nila ang buhatan sa MCWD ug matud niya nga giablihan kini sa security guard nga anaa ang presensiya sa mga taga LWUA ug Lapid.

Ug human sa installation ni Lapid namiya sila nga walay bitbit sukwahi sa pasangil nga nanguha sila og mga importanteng dokumento.

Sayo pa, nihunong ang MCWD sa ilang operasyon human giingong gipasirad-an sa mga tawo sa city hall ang main office sa MCWD ug giingong gipugos sa pagsulod ang buhatan sa general manager ug adunay giguba sa sulod.

Samtang si Minerva Gerodias, tigpamaba sa MCWD nagkanayon nga padayon pa ang ilang inventory sa mga butang aron masusi kong adunay nangawala ug gitun-an usab sa opisyales sa maong ahensiya ang legal action nga ilang himuon.

Si Gerodias nangayo og dispensa sa tanang konsumidor nga nahago pag-adto sa ilang buhatan niadtong Martes ug wala naserbisyohi ilabi na kadton wala makadawat sa mga notisya nga ilang gipadangat. (BANAT NEWS)