Ayuda sa mga seniors sa Mandaue

CEBU, Philippines — Gisugdan na sa kagamhanan sa siyudad sa Mandaue niadtong Martes Abril 16, ang pag-apod-apod sa unang hugna sa pinansiyal nga ayuda alang sa 28,000 nga narehistro nga mga senior citizen.

Kini gidungan sa gipahigayon nga caravan of services diin daghang serbisyo alang sa mga seniors ang gidalit apil na ang libreng medical ug dental consultation, legal consulation libreng pag notaryo, libreng tupi ingon man national ID applications.

Gihimo ang kalihukan diha sa Mandaue City Cultural and Sports Complex sa Sitio Tribunal sa Barangay Centro sa maong dakbayan.

Nadawat sa mga seniors ang P4,000 o katunga sa P8,000 nga tinuig nga financial assistance nga gihatag sa kagamhanan sa Mandaue.

Laing serbisyo mao ang pagtabang sa pag-follow up sa ilang SSS pinaagi sa gipahimutang nga SSS help desk, libreng pagkaon, libreng tubig o softdrink gikan sa miabag usab nga mga pribadong establisamento.

Mokabat sa 27 ka barangay sa dakbayan maoy unang nakadawat sa ayuda sa mga senior citizen nga naggikan sa Ibabao Estancia, Tawason, Guizo ug Cambaro.

Ang pag-apod-apod sa pinansiyal nga ayuda sa uban pa nga mga barangay magpadayon hangtod sa Abril 29, 2024 nga adto gihapon himoon sa Mandaue City Cultural and Sports Complex. (BANAT NEWS)