Rama nimando og direct line sa city hall

CEBU, Philippines — Si Mayor Michael Rama nimando karon nga maghimo og direct line ang city hall aron mahimong maduolan sa mga Sugbunaon nga adunay pamilya didto sa Taiwan samtang Talisay City Mayor Samsam Gullas andam usab sa higayon nga adunay mga Talisaynon nga adunay pamilya nga atoa sa Taiwan magpatabang kaniya.

Matud ni Rama nga sa nahitabo nga linog sa Taiwan sigurado nga dili tiaw ang gibati karon nga kabalaka sa mga Sugbuanon nga adunay mahal sa kinabuhi nga atoa sa maong lugar.

Ug mahimo siya nga duolon o tawagan sa numbero sa cellphone nga 09173284711 o ang iyang buhatan sa mga taga dakbayan nga kong aduna sila’y mga kabanay nga atoa sa Taiwan nga gustong magpakisayod sa ilang kahimtang.

Ang buhatan ni Rama aduna usab kini giandam nga lamesa diin adunay mga telephone o WiFi nga mahimong magamit nga magpakisayod sa kahimtang sa ilang mga kabanay sa Taiwan.

Si Rama makig-alayon usab sa mga opisyal sa kaulohan aron magpakisayod sa kahimtang sa mga Sugboanon nga atoa sa maong lugar human sa nahitabong linog.

Susama usab niini ang gibutyag ni Gullas diin andam siya nga motabang sa mga Talisaynon kong adunay mga kabanay nga atoa sa Taiwan. (BANAT NEWS)